வற்றாப்பளை கோயில் திருவிழாவில் கலந்து கொள்ளும் அனைத்து பக்தர்களின் பாதுகாப்பையும் சீரான போக்குவரத்தையும் உறுதி செய்வதற்காக, திருவிழா காலம் முழுவதும் விசேட போக்குவரத்து மேலாண்மைத் திட்டம் நடைமுறைபடுத்தப்பட்டுள்ளதாக முல்லைத்தீவு மாவட்ட அனர்த்த முகாமைத்துவ ஒருங்கிணைப்பு பிரிவு தெரிவித்துள்ளது.
அனைத்து வாகன சாரதிகளும் பக்தர்களும் குறித்த போக்குவரத்து வழிகாட்டுதல்களைப் பின்பற்றுமாறு கோரிக்கை விடுக்கப்பட்டுள்ளது.
அதன்படி வற்றாப்பளை கோயில் பகுதிக்குள் நுழையும் அனைத்து வாகனங்களும் முல்லைத்தீவு-மாங்குளம் வீதியில் 3வது மைல் கல் சந்தியை பயன்படுத்த வேண்டும் எனவும் இந்த சந்தி கோவில் வளாகத்திற்கு வரும் அனைத்து போக்குவரத்திற்கும் முதன்மை நுழைவுப் வீதியாக செயல்படும் எனவும் தெரிவிக்கப்பட்டுள்ளது.
மேலும், கோயில் தரிப்பிடத்தில் இருந்து, வாகனங்கள் வற்றாப்பளை சலூன் சந்தி வழியாக வெளியேறி, வற்றாப்பளை-முள்ளியவளை வீதி வழியாக சந்தியம்மன் சந்தி முல்லைத்தீவு-மாங்குளம் வீதியில் செல்ல வேண்டும் எனவும் கேப்பாபிலவு வீதி வழியாக வெளியேறும் வாகனங்கள் சலூன் சந்தி வழியாகவும் வெளியேறலாம் எனவும் தெரிவிக்கப்பட்டுள்ளது.
இதேவேளை, புதுக்குடியிருப்பிலிருந்து கேப்பாபிலவு வீதி வழியாக பயணிக்க திட்டமிடும் பக்தர்கள் முல்லைத்தீவு பிரதான வீதியைப் பயன்படுத்துமாறு அறிவுறுத்தப்படுகிறார்கள்.
அனைவருக்கும் பாதுகாப்பான, அமைதியான மற்றும் நன்கு ஒழுங்கமைக்கப்பட்ட யாத்திரை அனுபவத்தை உறுதி செய்வதற்காக அனைத்து பக்தர்களும் வாகன ஓட்டுநர்களும் போக்குவரத்து காவல்துறை மற்றும் விழா ஏற்பாட்டாளர்களுடன் முழுமையாக ஒத்துழைக்குமாறு முல்லைத்தீவு மாவட்ட அனர்த்த முகாமைத்துவ ஒருங்கிணைப்பு பிரிவு கோரியுள்ளது.
