பிரித்தானியாவின் பிரிட்டிஷ் எயார்வேஸ் (British Airways) நிறுவனமானது 10 ஆண்டுகளுக்குப் பிறகு இலங்கைக்கான விமான சேவைகளை மீண்டும் தொடங்கியுள்ளது. இதன் முதல் விமானம் இன்று சனிக்கிழமை (24) காலை கட்டுநாயக்கவில் உள்ள பண்டாரநாயக்க சர்வதேச விமான நிலையத்தை வந்தடைந்துள்ளது.
லண்டன் கெட்விக் (Gatwick) விமான நிலையத்திலிருந்து BA2045 என்ற விமான இலக்கத்துடன் புறப்பட்ட போயிங் 777-200ER ரக விமானம் இன்று காலை கொழும்பை வந்தடைந்துள்ளது. இதன் ஊடாக பிரிட்டிஷ் ஏர்வேஸ் (British Airways) நிறுவனம் இலங்கைக்கான தனது விமான சேவையை அதிகாரப்பூர்வமாக மீண்டும் தொடங்கியுள்ளமை உறுதிப்படுத்தப்பட்டுள்ளது.
இலங்கைக்கும் பிரித்தானியாவிற்கும் இடையிலான வான்வழி இணைப்பை வலுப்படுத்தும் வகையில், லண்டன் கெட்விக் மற்றும் கொழும்பு இடையே வாரத்திற்கு மூன்று விமானங்களை இயக்க இந்நிறுவனம் திட்டமிட்டுள்ளது.
இலங்கையின் முக்கிய சுற்றுலாச் சந்தைகளில் ஒன்றாக பிரித்தானியா விளங்குவதால், இந்த சேவை மீண்டும் தொடங்கப்பட்டிருப்பது நாட்டின் சுற்றுலாத்துறைக்கு பெரும் ஊக்கமளிக்கும் என எதிர்பார்க்கப்படுகிறது.
மேலும், இந்த புதிய சேவையானது வணிகப் பயணங்களை இலகுபடுத்துவதுடன், இரு நாடுகளுக்கும் இடையிலான வர்த்தகம், சுற்றுலா மற்றும் மக்களுக்கிடையிலான தொடர்புகளை வலுப்படுத்தும் என்றும் எதிர்பார்க்கப்படுகிறது.
இலங்கையின் ஹேலிஸ் (Hayleys) குழுமத்தின் துணை நிறுவனமான அட்வான்டிஸ் ஏவியேஷன் சர்வீசஸ் (Advantis Aviation Services), இலங்கையில் பிரிட்டிஷ் ஏர்வேஸின் பொது விற்பனை முகவராக (GSA) செயற்படும் என தெரிவித்துள்ளது.
பிரிட்டிஷ் ஏர்வேஸின் கொழும்பு வழித்தடமானது குளிர்கால அட்டவணையின்போது ஒரு பருவகாலச் சேவையாக இயக்கப்படும். மேலும் பயணிகள் எகனமி, ப்ரீமியம் எகனமி மற்றும் பிஸ்னஸ் க்ளாஸ் ஆகிய விருப்பங்களைத் தெரிவுசெய்து பயணிக்கலாம் என குறிப்பிட்டுள்ளது.
