அரசியலமைப்பின் 22வது திருத்தச் சட்டமூலம் நீதித்துறையின் சுதந்திரத்தைப் பலவீனப்படுத்தி, அதிகாரப் பிரிவினையைச் சீர்குலைக்கும் என எதிர்க்கட்சித் தலைவர் சஜித் பிரேமதாச தெரிவித்துள்ளார்.
நாடாளுமன்றத்தில் இன்று (25) இடம்பெற்ற அரசியலமைப்பின் 22வது திருத்தச் சட்டமூலம் மீதான விவாதத்தின் போதே அவர் இதனைக் குறிப்பிட்டார்.
நீதித்துறை மீதான மக்களின் நம்பிக்கையை இந்தச் சட்டமூலம் பாதிக்கும் என்பதால், உடனடியாக இதனை மீளப்பெற வேண்டும் எனவும் அவர் வலியுறுத்தினார்.
உத்தேச மாற்றங்கள் நிறைவேற்றுத்துறை, நாடாளுமன்றம் மற்றும் நீதித்துறைக்கு இடையிலான சமநிலையைக் குலைத்து, நீதித்துறை மீது அதிக அழுத்தத்தை ஏற்படுத்தும் என எதிர்க்கட்சித் தலைவர் எச்சரித்தார்.
சட்டமூலம் தொடர்பாக உரிய தரப்பினரும் சட்ட நிறுவனங்களும் போதியளவில் கலந்தாலோசிக்கப்படவில்லை என்றும் அவர் குற்றம் சுமத்தினார்.
இந்தச் சட்டமூலத்திற்கு சர்வஜன வாக்கெடுப்பு அவசியமில்லை என உயர்நீதிமன்றம் தீர்ப்பளித்துள்ளமை குறிப்பிடத்தக்கது.
எதிர்க்கட்சியின் குற்றச்சாட்டுக்களை அரசாங்கம் நிராகரித்துள்ளது. நீதிமன்றங்களில் நிலவும் வழக்குகளைத் தாமதமின்றி விரைவுபடுத்துவதற்கும், சிறந்த நீதித்துறைச் சேவைகளை வழங்குவதற்குமான பரந்த சீர்திருத்தங்களின் ஒரு பகுதியே இந்தத் திருத்தச் சட்டமூலம் என அரசாங்க பிரதிநிதிகள் தெரிவித்தனர்.
