இந்த ஆண்டு வெளிநாட்டு வேலைவாய்ப்புகளுக்காக 2.5 இலட்சம் பேரை அனுப்ப இலக்கு நிர்ணயிக்கப்பட்டுள்ளதாக இலங்கை வெளிநாட்டு வேலைவாய்ப்புப் பணியகம் தெரிவித்துள்ளது.
இந்த ஆண்டின் முதல் ஆறு மாதங்களில் 1,25,018 பேர் வெளிநாட்டு வேலைவாய்ப்புகளுக்காகப் பதிவு செய்துள்ளதாகவும் பணியகம் குறிப்பிட்டுள்ளது.
அத்துடன், இலங்கை வெளிநாட்டு வேலைவாய்ப்புப் பணியகத்தின் சந்தைப்படுத்தல் பிரிவு, ஒன்பது மாகாணங்களையும் உள்ளடக்கிய தேசிய மட்டத்திலான வேலைவாய்ப்பு ஊக்குவிப்புத் திட்டமொன்றை முன்னெடுக்கத் திட்டமிட்டுள்ளது.
இதற்கமைய, தெற்கு, மேல், சபரகமுவ, ஊவா, வடமத்திய மற்றும் வடமேல் ஆகிய ஆறு மாகாணங்களை மையப்படுத்தி இதுவரை ஆறு நிகழ்ச்சித்திட்டங்கள் நடத்தப்பட்டுள்ளன.
இந்த ஆண்டு இறுதிக்குள் வடக்கு, மத்திய மற்றும் கிழக்கு மாகாணங்களிலும் வெளிநாட்டு வேலைவாய்ப்பு ஊக்குவிப்பு நிகழ்ச்சிகளை நடத்தத் திட்டமிடப்பட்டுள்ளது.
மேலும், நாடளாவிய ரீதியில் 87 தொழிற்பயிற்சி நிகழ்ச்சிகள் நடத்தப்பட்டுள்ளதுடன், எதிர்காலத்தில் மேலும் 123 நிகழ்ச்சிகளை நடத்துவதற்கும் திட்டமிடப்பட்டுள்ளது.
