மலையகத் தமிழர்களை இழிவுபடுத்தும் வகையில் சமூக ஊடகங்களில் வெளியிடப்பட்டுள்ள கருத்துக்களுக்கு இலங்கைத் தொழிலாளர் காங்கிரஸின் பொதுச் செயலாளரும் நாடாளுமன்ற உறுப்பினருமான ஜீவன் தொண்டமான் கடும் கண்டனம் தெரிவித்துள்ளார்.
மலையகத் தமிழர்கள் கழிவறைகளைச் சுத்தம் செய்யவும், தேயிலை கொழுந்து பறிக்கவும் வந்தவர்கள் எனக் கூறி, இழிவுபடுத்தும் வகையில் இந்தக் கருத்துக்கள் வெளியிடப்பட்டுள்ளதாக அவர் தெரிவித்துள்ளார்.
இது வெறுமனே ஒரு சமூக ஊடகப் பதிவு அல்ல என்றும், தலைமுறை தலைமுறையாக மலையகத் தமிழ் மக்கள் எதிர்கொண்ட இனவாத வெளிப்பாடு என்றும் ஜீவன் தொண்டமான் குறிப்பிட்டுள்ளார்.
மலையகத் தமிழ் மக்களின் முன்னோர்கள் கடினமான மலைப்பகுதிகளில் பல்வேறு சவால்களுக்கு மத்தியில் உழைத்து, நாட்டின் தேயிலைத் தொழிலின் வளர்ச்சிக்கு முக்கிய பங்களிப்பை வழங்கியுள்ளதாகவும் அவர் சுட்டிக்காட்டியுள்ளார்.
இந்தநிலையில், மலையக மக்களை இழிவுபடுத்தும் வகையில் தெரிவிக்கப்பட்ட கருத்துக்களுக்கு எதிராக நாடாளுமன்ற அமர்வில் கேள்வி எழுப்புவதாகவும் ஜீவன் தொண்டமான் தெரிவித்துள்ளார்.
