ஐபிஎல் வரலாற்றின் மிக வெற்றிகரமான மற்றும் நீண்ட கால பார்ட்னர்ஷிப்களில் ஒன்றான சென்னை சூப்பர் கிங்ஸ் (சிஎஸ்கே) மற்றும் அதன் தலைமை பயிற்சியாளர் ஸ்டீபன் ஃபிளமிங் இடையேயான 18 ஆண்டுகாலப் பயணம் தற்போது அதிகாரப்பூர்வமாக நிறைவுக்கு வந்துள்ளது. சிஎஸ்கே நிர்வாகமும் ஸ்டீபன் ஃபிளமிங்கும் பரஸ்பர ஒப்புதலுடன் இந்த முக்கிய முடிவை எடுத்துள்ளதாக அணி நிர்வாகம் அறிவித்துள்ளது. கடந்த 2024, 2025 மற்றும் நடப்பு 2026 ஆகிய மூன்று ஐபிஎல் சீசன்களிலும் சென்னை சூப்பர் கிங்ஸ் அணி பிளே-ஆஃப் சுற்றுக்குத் தகுதி பெறத் தவறியதுடன், இந்த சீசனில் 8-வது இடத்தைப் பிடித்து ஏமாற்றமளித்தது. அணியில் பெரிய அளவிலான மறுசீரமைப்பைக் கொண்டுவரும் நோக்கில் இருதரப்பும் விரிவான ஆலோசனைகளை மேற்கொண்ட பின்னரே இந்த பிரியாவிடை முடிவு எட்டப்பட்டுள்ளது.

கடந்த 2008ஆம் ஆண்டு நடைபெற்ற முதலாவது ஐபிஎல் தொடரில் சிஎஸ்கே அணியின் தொடக்க வீரராகக் களம் இறங்கிய ஸ்டீபன் ஃபிளமிங், அடுத்த ஆண்டே அதாவது 2009இல் அணியின் தலைமை பயிற்சியாளராகப் பொறுப்பேற்றார். தோனி மற்றும் ஃபிளமிங் கூட்டணியின் கீழ் சிஎஸ்கே அணி 5 முறை ஐபிஎல் சாம்பியன் பட்டங்களையும், 2 முறை சாம்பியன்ஸ் லீக் டி20 கோப்பைகளையும் வென்று அசாத்திய சாதனை படைத்தது. மேலும் இவருடைய பதவிக்காலத்தில் சிஎஸ்கே அணி 12 முறை பிளே-ஆஃப் சுற்றுக்கு முன்னேறியதுடன், 10 முறை ஐபிஎல் இறுதிப்போட்டி வரை சென்று உலக அளவில் டி20 கிரிக்கெட்டின் மிகச் சிறந்த அணியாக உருவெடுத்தது.

தங்களது நீண்ட காலப் பயணம் முடிவுக்கு வருவது குறித்துப் பேசிய ஸ்டீபன் ஃபிளமிங், விளையாட்டு உலகில் 18 ஆண்டுகள் என்பது ஒரு வாழ்நாளுக்குச் சமம் என்றும், இந்த அணியை வழிநடத்தியதை எனது ஒட்டுமொத்த கிரிக்கெட் வாழ்க்கையின் மிகப்பெரிய பாக்கியமாகக் கருதுவதாகவும் நெகிழ்ச்சியுடன் தெரிவித்துள்ளார். சிஎஸ்கே அணியின் உரிமையாளர் ரூபா குருநாத், ஃபிளமிங் தங்களது ஒட்டுமொத்த பயிற்சிப் பிரிவின் இதயத்துடிப்பாக விளங்கியவர் என்று பாராட்டி, அவருடைய அர்ப்பணிப்பிற்கும் தலைமைத்துவத்திற்கும் நன்றி தெரிவித்து விடை கொடுத்துள்ளார். ஃபிளமிங்கின் இந்த திடீர் விலகல் ரசிகர்களிடையே பெரும் சோகத்தை ஏற்படுத்தியுள்ள நிலையில், அவருக்குப் பதிலாக டெல்லி கேப்பிட்டல்ஸ் அணியின் பயிற்சியாளராக இருந்த முன்னாள் இந்திய வீரர் ஹேமங் பதானி சிஎஸ்கே அணியின் புதிய பயிற்சியாளராகப் பொறுப்பேற்க அதிக வாய்ப்புள்ளதாகத் தகவல்கள் வெளியாகியுள்ளன.