கரூரில் தமிழக வெற்றிக் கழகத்தின் (தவெக) தேர்தல் பிரச்சாரக் கூட்ட நெரிசலில் சிக்கி உயிரிழந்தவர்களின் குடும்பத்தினருக்கு அரசு வேலை வழங்க திட்டமிட்டிருப்பதற்கு, நாம் தமிழர் கட்சியின் தலைமை ஒருங்கிணைப்பாளர் சீமான் கடும் கண்டனமும் எதிர்ப்பும் தெரிவித்துள்ளார்.
பின்னணி என்ன?
கடந்த செப்டம்பர் 27 ஆம் தேதி கரூரில் தவெக தலைவர் விஜய் பங்கேற்ற தேர்தல் பிரச்சாரக் கூட்டத்தில் ஏற்பட்ட கடுமையான கூட்ட நெரிசலில் சிக்கி, பெண்கள், குழந்தைகள் உட்பட 41 பேர் பரிதாபமாக உயிரிழந்தனர். இந்தத் துயரச் சம்பவத்தில் பாதிக்கப்பட்ட குடும்பங்களைச் சந்தித்து ஆறுதல் கூறுவதற்காக, தமிழக முதல்வர் விஜய் ஜூலை 10 ஆம் தேதி கரூர் செல்ல உள்ளதாகத் தகவல்கள் வெளியாகியுள்ளன.
இதற்கிடையே, உயிரிழந்தவர்களின் குடும்பத்தில் தலா ஒருவருக்கு அரசு வேலை வழங்க தமிழக அரசு திட்டமிட்டு வருவதாகக் கூறப்படும் நிலையில், இதற்கு சமூக வலைத்தளங்களிலும் அரசியல் வட்டாரத்திலும் பரவலான விவாதங்களும் எதிர்ப்புகளும் கிளம்பியுள்ளன.
இடைத்தேர்தல் அற்ப அரசியல் – சீமான் சாடல்:
இது தொடர்பாக நாம் தமிழர் கட்சியின் தலைமை ஒருங்கிணைப்பாளர் சீமான் வெளியிட்டுள்ள எக்ஸ் (X) பதிவில், தவெக தலைவர் விஜய் மற்றும் தமிழக அரசை மிகக் கடுமையாக விமர்சித்துள்ளார்.
அவரது பதிவில் குறிப்பிட்டுள்ளதாவது:
“ஆட்சிப் பொறுப்பேற்று 50 நாட்களாகியும் கரூருக்குச் சென்று பாதிக்கப்பட்ட குடும்பங்களைச் சந்திக்காத முதல்வர் விஜய், தற்போது அதிமுகவைச் சேர்ந்த சட்டமன்ற உறுப்பினர் எம்.ஆர். விஜயபாஸ்கர் தவெகவில் சேர்ந்தவுடன் அவசர அவசரமாக கரூருக்குச் செல்ல முற்படுவதும், மரணித்தவர்களின் குடும்பத்தினருக்கு அரசு வேலை வழங்கத் திட்டமிடுவதும் மலினமான வாக்கரசியலாகும். இது கரூர் இடைத்தேர்தலை மனதில் வைத்துச் செய்யப்படும் அற்பத்தனம்.”
லட்சக்கணக்கான இளைஞர்களின் உரிமை பறிக்கப்படுகிறதா?
பாதிக்கப்பட்ட குடும்பங்களுக்கு ஏற்கனவே தலா 35 லட்சம் ரூபாய் வரை துயர்துடைப்புத் தொகை வழங்கப்பட்டுவிட்டதைச் சுட்டிக்காட்டிய சீமான், “அரசு அலுவலகத்தில் பதிவு செய்துவிட்டு, வேலைக்காகப் பல லட்சக்கணக்கான தமிழ்நாட்டு இளைஞர்கள் காத்துக்கொண்டிருக்கிறார்கள். அவர்களுக்குரிய வேலைவாய்ப்பினைத் தராமல், இடைத்தேர்தல் அரசியல் லாபத்துக்காக அரசு வேலையைத் தாரைவார்ப்பது கடும் கண்டனத்திற்குரியது” என்று சாடியுள்ளார்.
மேலும், நாட்டின் பாதுகாப்புக்காக எல்லையில் உயிர்த்தியாகம் செய்த ராணுவ வீரர்களின் குடும்பங்களுக்கோ, நச்சு வாயு தாக்கி உயிரிழந்த தூய்மைப் பணியாளர்களின் குடும்பங்களுக்கோ அல்லது சிங்கள கடற்படையால் கொல்லப்பட்ட மீனவர் குடும்பங்களுக்கோ கிடைக்காத அரசுப் பணி, திரைக்கவர்ச்சிக்குப் பலியானவர்களின் குடும்பங்களுக்குக் கிடைப்பது எந்த விதத்தில் நியாயம்? என்றும் கேள்வி எழுப்பியுள்ளார்.
தனிப்பட்ட முறையில் உதவட்டும்:
“பாதிக்கப்பட்ட குடும்பங்களுக்குக் கூடுதலாக உதவ விரும்பினால், அதைத் தவெக சார்பாகவோ அல்லது முதல்வர் விஜய் தனது தனிப்பட்ட முறையிலோ செய்யட்டும். அதை விடுத்து, அரசு வேலையை இடைத்தேர்தலுக்கான கேடயமாகப் பயன்படுத்துவது முறையானதல்ல” என்று சீமான் தனது அறிக்கையில் தெளிவுபடுத்தியுள்ளார்.
இதற்கிடையே, தவெக கூட்ட நெரிசலில் உயிரிழந்தவர்களின் குடும்பங்களுக்கு அரசு வேலை வழங்குவதற்கு எதிர்ப்பு தெரிவித்து, நாம் தமிழர் கட்சியைச் சேர்ந்த தீரன் திருமுருகன் என்பவர் உயர்நீதிமன்ற மதுரை அமர்வில் மனுத்தாக்கல் செய்துள்ளார் என்பதும் குறிப்பிடத்தக்கது.
