இலங்கையின் சிரேஷ்ட ஊடகவியலாளரும், அரசியல் ஆய்வாளருமான டி.பி.எஸ். ஜெயராஜ் (D.B.S. Jeyaraj) தனது 72ஆவது வயதில் கனடாவில் காலமானதாக செய்திகள் தெரிவிக்கின்றன.
இலங்கையின் இன அரசியல், உள்நாட்டு யுத்தம் மற்றும் தற்போதைய அரசியல் நிலவரங்கள் குறித்து பல தசாப்தங்களாக விரிவான அறிக்கைகளையும், ஆழமான அரசியல் பகுப்பாய்வுகளையும் வழங்கி வந்த அவர், இலங்கையின் மிக முக்கியமான மற்றும் முதன்மை வாய்ந்த ஊடகவியலாளர்களில் ஒருவராகக் கருதப்பட்டார்.
இலங்கையில் தனது ஊடகத்துறைப் பயணத்தை ஆரம்பித்த அவர், பின்னர் கனடாவுக்குப் புலம்பெயர்ந்தார்.
கனடாவில் இருந்தவாறே தனது பிரத்தியேக இணையத்தளம் மற்றும் பத்திரிகை பத்திகள் (Columns) ஊடாகத் தொடர்ந்து எழுதி வந்தார்.
தமிழ் அரசியல் விவகாரங்கள் மற்றும் இலங்கையின் உள்நாட்டு யுத்தம் தொடர்பான அவரின் ஆழமான பதிவுகள் உள்நாட்டிலும் சர்வதேச ரீதியிலும் அவருக்குப் பெரும் அங்கீகாரத்தைப் பெற்றுக்கொடுத்தன.
விரிவான அரசியல் ஆய்வுகள் மற்றும் வரலாற்றுப் பின்னணிகளைத் தேடும் வாசகர்கள் மத்தியில், பல தசாப்தங்களாக ஒரு மதிக்கத்தக்க ஊடகக் குரலாக டி.பி.எஸ். ஜெயராஜ் விளங்கி வந்தார்.
